Hustisya mailap pa rin sa pamilya ng biktima ng hit and run sa Barcelona

 

 

Angelica Manongsong Dalisay

For English please visit the following link: Still no justice for teen Pinay hit-and-run victim in Spain

Ni Daniel Infante Tuaño

Nagpamisa si Ginang Siony Manongsong Dalisay sa Iglesia de San Agustin sa Barcelona para sa yumaong anak na si Angelica, biktima ng hit and run.

Isang taon na ang nakalipas pero sariwa pa rin sa ina ang trahedya.

Nasagaan habang tumatawid ang 17-taong-gulang na si Angelica sa pedestrian lane sa Munisipalidad ng Gava sa Barcelona.

Ligtas ang kasamang anak at nobyo niya pero nahagip siya at binawian ng buhay dahil sa matinding sugat na natamo.

Ayon sa public attorney na ibinigay sa naulilang pamilya, kusang sumuko ang suspek dahil natunugan niyang mahuhuli na siya ng pulis base na rin sa nakuhang impormasyon sa mga testigo.

Nadistract umano ng celphone ang suspek habang nagmamaneho. Nadiskubri ring expired na ang driver’s license niya at hindi siya ang may-ari ng sasakyan.

Ang suspek ay kinasuhan ng homicide at failure to lend help to injured persons.

Kasalukuyan siyang nakalalaya, pero bawal siyang lumabas ng bansa at pinagrereport sa husgado kada lunes.

Naghihintay pa ng resolusyon mula sa husgado para makapagsampa ng “acusacion” o karampatang kaso laban sa suspek.

“Kung titingnan ko bilang optimista, makatwiran lang na sa loob ng isang taon, magkakaroon na ng hearing, dahil kontrolado na rin ang tema, alam na kung sino,” ani Atty. Ramon Ga Rojas Jaile sa Español.

Masama ang loob ni Ginang Siony sa mabagal na pag-usad ng kaso. Gusto na sana nilang makamit ang hustisya bago pa man iuwi ang abo ni Angelica sa Pilipinas.

“Hintay ka nang hintay, nakakasama ng loob. Gusto kong magalit pero kanino? Yun umiiyak na lang ako dahil habang nagsisindi ako ng kandila sa ceniza nya gabi-gabi gusto kong sabihin na ayan na may nangyari na sa kaso, may nanagot na sa gumawa sa iyo, pero wala, wala akong masabi dahil wala naman talaga. Sabi nga nila walang kasingsakit na mawalan ng isang anak,” ani Gng. Manongsong Dalisay

Nanawagan si Gng. Siony sa konsulado at mga asosasyong pilipino na tulungan siyang mapabilis ang resolusyon sa kaso.

Ang ulat na lumabas sa Balitang Global, TFC, ABS-CBN

Pinay sa España nagnakaw umano sa alagang matanda, timbog!

As reported by Daniel Infante Tuaño on Balitang Global, TFC, ABS-CBN

For English, please click this link: abs-cbnnews.com

 

Mossos d’Esquadra

Kalaboso ang isang Pilipina sa Barcelona matapos umano niyang pagnakawan at painumin pa ng pampakalma ang inaalagaang matanda.

Nakapiit sa Barcelona ang Pilipinang si “Marilou”, ‘di tunay na pangalan, taga-Barcelona sa kasong pagpapainom niya ng benzodiazepine, isang gamot na pampakalma, para nakawan ang matandang inaalagaan.

Anim na buwang inalagaan ng suspect ang matanda at siya lang ang parating kasama.

Noong una, mga alahas umano na nagkakahalagang 9,720 euros o mahigit 460,000 pesos ang ninakaw niya.

Pero ayon sa pamilya ng biktima – maraming alahas pa na aabot sa 35,000 euros o higit 1.6 million pesos ang nawawala.

Sa imbestigasyon ng pulisya sa rehiyon ng Catalunya, Mossos d’Esquadra, nagwithdraw pa raw ang suspek ng 18,700 euros o higit 880,000 pesos sa bank account ng biktima simula noong kalagitnaan ng Pebrero.

Dahil sa paglala ng kalusugan ng 85-taong gulang na biktima, nagdesisyon ang pamilya na ipasok siya sa residencia o nursing home pero pag kailangan, si Marilou pa rin ang nag-aalaga.

Nagsimula raw magduda ang pamilya nang makitang maraming withdrawal sa bank account ng matanda.

Pinacheck up nila ang biktima at napatunayang pinapainom ng gamot pampakalma kaya nagsampa na ng kaso ang pamilya laban sa suspect.

Nadakip si Marilou noong ika-18 ng Marso at nakuha rin sa kanya ang bank book at credit card ng matanda, 725 euros, at authorization para magwithdraw na umano’y kanyang pineke.

Hindi pa malinaw ang motibo ng suspect sa pagnanakaw ayon sa pulisya.

“Maaaring dahil sa utang. May pinagkakautangang malaki. Pero kaduda-duda ang teoryang ito dahil noong nagpunta ang pulisya sa bahay nya para masusing magimbestiga, napag-alamang bumili pa ito ng iphone 6 na nagkakahalaga ng 1,000 euros,” ani Carlos Fernandez sa Catalan, caporal ng Police Investigation Unit ng Mossos d’Esquadra.

Dagdag ni Fernandez dati nang may kasong pagnanakaw at estafa si “Marilou” pero nakalalaya dahil wala pang sentensya.

Hindi makapaniwala ang mga taga-Barcelona sa pangyayari dahil kapulaan ito sa magandang imahe ng mga Pinoy.

Ayon naman sa police na half Filipina-half Spanish na si Elizabet Cano Beredo,walang dapat ikabahala ang mga Pilipino.

“Nakakagulat ang nangyari pero isolated case lang ito. Tiwala pa rin sila sa mga Filipino. Wala namang problema sa mga Filipino kumpara sa ibang nasyonalidad.”

Sinubukan ng Balitang Global na kunin ang panig ni Marilou sa pamamagitan ng kanyang abogado pero tumanggi siyang magbigay ng pahayag.